avatar

Over JoeksDJ

Haelt de (Groeët-) Venlose vastelaovesmeziëk laevendig en in iëre!

Aldste venlose vastelaovesleedje

Van ‘nne bevrind leefhebber kreeg ik ônlangs ’n opname van ’t aldste venlose vastelaovesleedje. ’t Betref heej “de Sentimenteele (Och Mieke)” oët de 19e iëuw.

’t Leedje is destiëds geschreve door Jocus’ eige dermekidelaer, d’n hiër Gerhard Hamm. Bekind waas al det ’t leed zoëwiezoë oët 1885 stump. Nao waat ônderzeuk bin ik de iërste vermelding taegegekômme in de editie van 25 juni 1881 van ’t Venloosch Weekblad. Dao oët kinste opmake det ’t leedje toen al bestônd en op verzeuk van Jocus noow waort oëtgebrach op pepaer. Opnames ware nog neet meugelik / gebroeëkelik.

Vraog van mich: Wae zingk dit leedje? De opname is live en klink asof ’t oët de jaore ’50 van 20e iëuw kump. Reacties zien van herte welkôm!

Luuëster heej nao ’t leedje:

Venlose LVK-deilnemers vraoge um steun

De twieë Venlose deilnemers aan de halve finale van ’t LVK haope op steun van de Venlonaer. W-Dreej en Karen & Bart vertegenwaordige Venlo dit jaor.

Mit twieë leedjes is Venlo aanmerkelijk minder good vertegenwaordig in de halve finale dan de letste jaore. Volgens Quinn Warmerdam, de componis van beide leedjes, is ’t veur Venlose inzendinge baovedien neet eenvoudig um door te gaon, umdat ’t LVK in de stad pas ech begint te laeve as de finale in aantôch is. Veural in kleinere plaatse en dörpe wuuërt d’r in het veurtrajec al volop gestump door middel van bônne en sms’jes. Warmerdam zoël het moej vinde as de Venlonaer auk noow al achter de Venlose leedjes geit staon.

W-Dreej steit vriëdag 06 jannewari in de halve finale mit ’t leedje ‘Weej Dreije Door’. Karen & Bart zien op 20 jannewari aan de beurt mit ‘Tiéd van ut Jaor’.

Brôn: OmroepVenlo.nl

Slechs 2 Venlose leedjes door nao halve finale LVK 2017

Dit jaor zien ‘slechs’ 2 leedjes oët (Groeët-) Venlo door nao de halve finale van ’t LVK. Hoewaal Noord-Limburg de hofleverancier is van de halve finale, duit Venlo ’t dit jaor neet zoë good.

Waal de felicitasies veur:

Karen & Bart – “Tiéd van ’t jaor”

en W-Dreej – “Weej dreije door”

Döbbele felicitasie veur Quinn Warmerdam; hae schreef beide leedjes.