Wortelepin äöpent vastelaovesseizoen op tillevisie

De liedjesaovend (veurhaer: Liedjesmatinee) van de Wortelepin is net wie veurig jaor live te volge beej Umroop Venlo. Thoës op de bank, maar auk in ‘t Raodhoës.

De Bliërickse vastelaovesvereiniging zet dit kiër in op ‘n liedjesfinale mit publiek. Wanniër de coronaregels ‘t toelaote, wuuërdt de zaal op zaoterdaag 02 oktoeëber ingerich as hoëskamer, wao de vakzjurie zal plaatsneme tösse de toeschouwers en auk ‘t artistekefee wuuërdt ingericht. De elf liedjes waere net wie veurig jaor gebrach vanoët de studio op ‘t Nedinscoplein.

Meidoon? De inschrieëftermiën sluuët op 01 augustus, de veurselectie vindt plaats op maondaag 13 september.

Brôn: De Limburger

Finale LVK kômmend jaor in Venraoj

De finale van ‘t LVK (Limburgs Vastelaovesleedjes Konkoer) zal kômmend jaor op 11 fibbrewari plaatsvinde in Venraoj. Det haet de organisatie net bekindgemak.

Vanwaege corona waas d’r afgelaupe seizoen ‘n alternatieve finale, wao in veuraaf opgenaome clips van artiste waorte oëtgezônde. Dit kiër is d’r dus waal weer ein finale op lokasie.

In 2016 vônd de finale van ‘t LVK auk al plaats in Venraoj, toen in de ivvenementehal. Op welke Venraojse lokasie de finale noow wuuërt gehalde, wuuërt later bekind gemak.

Brôn: De Limburger.

Vastelaovend 2021?!

In andere jaore zoël ‘t vastelaovesseizoen noow volop in bleuj zien. Um dit vraemde jaor neet gans verlaore te laote gaon, prissentaer ik vanaaf zaoterdaag 15 jannewari wiës aan Aswoensdaag eedere daag ‘nne Groeët-Venlose vastelaovesklassieker op mien Facebook-pagina.

Dus miër dan 4 waeke langk eedere daag um 11 euver 11 ein bietje joeks!